| గాయమై మిగిలి ||

ఆకాశమూ ఒక్కోసారి నిర్లిప్తంగా
మేఘంలో దాగున్న సూరీడు
కురవలేక ఆగిపోయిన వానజల్లు
అనిర్వచనీయమైన ఆకారం

మాటాడాలని మనసనుకున్నా
నీడలు కూడా తోడు దొరకవు
మిన్నకుండి పోతాను మిన్నును చూస్తూ

నింగి వర్షించలేకున్నా
మనసు వర్షింస్తుంది
నిశీధిని కౌగిలించుకుని
పట్టపగలూ చీకటి వెలిబుచ్చుతూ

చిరుగాలి అలికిడీ వినిపించే నిశబ్దం
స్పందనలేని నన్ను తాకి తరలి వెళ్ళిపోతుంది

అంతరంగ శోధనలోనో
అనంత ఆకాశ వీక్షణలోనో
మౌనoగానే మునిగిపోతాను
వ్యక్తీకరించలేని మనసు
అర్ధంకాని ఆకాశమూ మధ్య

నలుగుతున్న మనసు
ఉక్కిరి బిక్కిరి అవుతూ
బదులు దొరకని ఆలోచన
గాయమై మిగిలిపోతాను
గుండె లోతును స్పర్శిస్తూ ...!!

......వాణి ,4 july 15