|| అస్పష్టత ||

నింగినే నిశితంగా చూస్తూ
ఎగురుతున్న పక్షులు
ఒలుకుతున్న సూరీడు 
మనసు ఎదుగుతుందపుడు
భావమై విహరించాలని

సాలెపురుగు కిటికీకి వేలాడుతూ
కొత్త గూటి నిర్మాణం భలేగా
చువ్వలకి అలవోకగా అల్లేస్తూ
ప్రత్యూషపు ఎండకి మెరుస్తూ
గజి బిజీ గూడే అందంగా
అపుడు మనసుకీ కొత్త ఆలొచన
అక్షరాలను కూడగట్టాలని

పేపర్ తిరగేద్దామని
పెజీలుతిప్పుతానా
మనసుకు ఎన్ని ప్రశ్నలో
మానభంగాలు,మాయారాజకీయాలు
అనాధల దీన గాధలు
తల్లితండ్రుల కన్నీటి కధలు
రోడ్లపై రాలిన జీవిత చరిత్రలు
అపుడూ అనిపిస్తుంది
కొన్ని కన్నీళ్ళను
కొంత ఆవేశాన్నికలమై వ్రెళ్ళగక్కాలని

నిద్రరాని రాత్రి చీకటి చెరిపెయ్యలేను
మనసు గతంలోకి వెళ్ళి గాబరా పెడుతుంది
నిద్రకై జో కొట్టుకోలేక
కొన్ని జ్ఞాపకాలు
పదాలలో పేర్చుకుంటాను
మనసు భారం దించుకుంటూ

ఏవైతేనేం మనసు ప్రసవించే భావాలు
తపన పడుతూ ప్రవహించాలని కవిత్వమై ...!!

.......వాణి