॥ యాంత్రికం ॥

స్వార్ధాన్ని కౌగిలించుకుంటు
బంధాల రెక్కలన్నీ రాలి పోతున్నాయి
దూరాల మాటలూ దగ్గరితనాన్ని కోల్పోతూ 
పదాలై కుచించుకు పోతున్న పలకరింపులు

అంతర్జాలపు రెక్కలు అతికించుకుంటూ
వాట్స్ యాప్ లో పలుకులు ఎగిరిపోతున్నాయి

ముఖ పుస్తకాన
శుభోదయాలు, శుభరాత్రులు
బొమ్మల్లో ఇమిడి పోతూ
నచ్చే వాక్యాల కోసం
చూపులై వేచి చూస్తుంటాయి

మౌనం ప్రకటించే మాటలు ఎన్నో
ఎదురు చూసే స్నేహం కోసం
ప్రపంచం వైపు దృష్టి సారిస్తాయి

మాటలు కరువై శబ్ధాలు బరువై
ప్రశాంతత కోల్పోయిన కాలుష్య రాజ్యంలో
కుత్రిమ జీవితాలౌతాయి
బ్రతుకు నటనగా నాలుగు గోడల మధ్య
బందీగా మిగిలిపోతుంది

ఆనందాలు వెతుకుతున్న మనసులకు
సర్ది చెప్పు కుంటూ
గతాలు నెమర వేసుకుంటున్న ప్రపంచం
నిట్టూర్పుల మయం
నిత్యం కొత్తదనాల కోసం
ఎదురుచూస్తూనే జీవనయానం ...!!

....వాణి