॥ వేదన ॥

నీ దూరం చేసిన గాయం
మనసు భారాన్ని మోయలేక
ప్రసవ వేదన మళ్ళీ గుర్తొస్తుంది

నిన్ను కోల్పోయిన సంఘర్షణ నుండి
తేరుకోలేక తారాడే నిశీధినయ్యాను

మిణుగురులూ మోసగించాయి
మిటకరించకుండా

నిశి నడకల్లో బోర్ల పడుతూనే ఉన్నాను
చీకటి నిండిన దైన్యంలా

చెవులు రిక్కించే ఉన్నాను
శబ్దించే స్ధలాన్ని చేరాలని

కన్నీటి సంద్రంలో దారి తప్పిన నావనై
ఈదుతూనే ఉన్నాను
ఆత్మీయ తీరం చేరాలని ...

........ వాణి